ನವದೆಹಲಿ: ಕೊರೊನಾ ಲಾಕ್ಡೌನ್ ಹಿನ್ನೆಲೆ ತನ್ನ ಅಂಗಡಿಗೆ ಗ್ರಾಹಕರು ಬಾರದೇ ಕಂಗಾಲಾಗಿದ್ದ 80 ವರ್ಷದ ವೃದ್ಧರೊಬ್ಬರು ಕಣ್ಣೀರಿಟ್ಟ ವಿಡಿಯೋ ಇತ್ತೀಚೆಗೆ ವೈರಲ್ ಆಗಿತ್ತು. ವಿಡಿಯೋ ನೋಡಿದ ಬಳಿಕ ಬಾಬಾ ಕಾ ಡಾಬಾ ಟ್ವಿಟರ್ನಲ್ಲಿ ಟ್ರೆಂಡ್ ಆಗಿತ್ತು. ಢಾಬಾಗೆ ಹೆಚ್ಚಿನ ಸಂಖ್ಯೆಯಲ್ಲಿ ಗ್ರಾಹಕರು ಬರಲಾರಂಭಿಸಿ ವ್ಯಾಪಾರ ಹೆಚ್ಚಾಗಿತ್ತು. ಆದ್ರೀಗ ವಿಡಿಯೋವನ್ನ ಚಿತ್ರೀಕರಿಸಿದ್ದ ಯೂಟ್ಯೂಬರ್ ನನ್ನ ಹೆಸರಲ್ಲಿ ದೇಣಿಗೆ ಸಂಗ್ರಹಿಸಿ ವಂಚನೆ ಮಾಡಿದ್ದಾರೆ ಎಂದು ಆರೋಪಿಸಿ ವೃದ್ಧ ಕಾಂತ ಪ್ರಸಾದ್ ದೂರು ದಾಖಲಿಸಿದ್ದಾರೆ.
ಗೌರವ್ ವಾಸನ್ ಅನ್ನೋ ಇನ್ಸ್ಟಾಗ್ರಾಂ ಇನ್ಫ್ಲುಯೆನ್ಸರ್ ಕಾಂತಾ ಪ್ರಸಾದ್ ಅವರ ವಿಡಿಯೋವನ್ನ ಚಿತ್ರೀಕರಿಸಿ ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡು ಗ್ರಾಹಕರು ಇವರ ಅಂಗಡಿಗೆ ಭೇಟಿ ಕೊಡುವಂತೆ ಮನವಿ ಮಾಡಿದ್ದರು.
ಇದನ್ನೂ ನೋಡಿ: Zomato ಪಟ್ಟಿಯಲ್ಲಿ “ಬಾಬಾ ಕಾ ಡಾಬಾ” – ನಿಮ್ಮೂರಿನ ಹೊಟೇಲ್‌ಗಳನ್ನು Zomato ಗೆ ಶಿಫಾರಸ್ಸು ಮಾಡಿ!
ಇದರಿಂದ ಬಾಬಾ ಕಾ ಢಾಬಾ ರಾತ್ರೋರಾತ್ರಿ ಫೇಮಸ್ ಆಗಿ, ವೃದ್ಧನಿಗೆ ನೆರವಾಗಿತ್ತು. ಅಲ್ಲದೆ ಅಪಾರ ಪ್ರಮಾಣದ ನೆರವು ಕೂಡ ಹರಿದುಬಂದಿತ್ತು. ಆದ್ರೆ ಅದೇ ವ್ಯಕ್ತಿಯ ವಿರುದ್ಧ ಈಗ ಕಾಂತಾ ಪ್ರಸಾದ್ ಸಿಡಿದೆದ್ದಿದ್ದಾರೆ.
ಗೌರವ್ ವಾಸನ್ ನಮ್ಮ ವಿಡಿಯೋ ಚಿತ್ರೀಕರಿಸಿ ಆನ್ಲೈನ್ನಲ್ಲಿ ಅಪ್ಲೋಡ್ ಮಾಡಿದ್ದರು. ಢಾಬಾ ಮಾಲೀಕನಿಗೆ ಹಣದ ಸಹಾಯ ಮಾಡಿ ಅಂತ ಸಾಮಾಜಿಕ ಜಾಲತಾಣದಲ್ಲಿ ಜನರಿಗೆ ಕೇಳಿದ್ದರು. ಆದ್ರೆ ಬೇಕಂತಲೇ ದೇಣಿಗೆ ಸಂಗ್ರಹಕ್ಕೆ ತನ್ನ ಹಾಗೂ ತನ್ನ ಸ್ನೇಹಿತರ ಬ್ಯಾಂಕ್ ಖಾತೆಗಳ ಮಾಹಿತಿ ಹಾಗೂ ಮೊಬೈಲ್ ನಂಬರ್ ಕೊಟ್ಟಿದ್ದಾರೆ. ಇದರಿಂದ ಭಾರೀ ಮೊತ್ತದ ದೇಣಿಗೆ ಸಂಗ್ರಹಿಸಿದ್ದಾರೆ. ಆದ್ರೆ ಹಣ ಬಂದಿರುವ ಬಗ್ಗೆ ನನಗೆ ಮಾಹಿತಿಯೇ ನೀಡದೆ ವಂಚಿಸಿದ್ದಾರೆ ಎಂದು ಕಾಂತಾ ಪ್ರಸಾದ್ ದೂರಿನಲ್ಲಿ ಉಲ್ಲೇಖಿಸಿದ್ದಾರೆ.
